"ЭРДЭНЭТ ҮЙЛДВЭР" ТӨҮГ-ЫН 49 ХУВЬТАЙ ХОЛБООТОЙ ХЭЛЦЭЛ НЭГ ШАТ АХИВ

Эрдэнэт үйлдвэр” ТӨҮГ-ын 49 хувийг ОХУ-ын “Ростех” компаниас худалдан авч Монголын талд оруулж ирсэн Монголын зэс корпораци, Монгол Улсын Засгийн газар хоорондын хэлцэл нэг шат ахилаа.

Монголын зэс корпорацийн мэдээллээр эхний шатны нөхөн төлбөрөө зургаадугаар сарын 30-ны өдөр авсан байна. Эрдэнэт уулын баяжуулах үйлдвэр болон “Монросцветмет”-ийн 49 хувийг авах хэлцэлд 400 сая ам.доллар буюу өнөөгийн ханшаар 1.25 их наяд төгрөг зарцуулж байжээ. Харин Засгийн газраас 1.1 их наяд төгрөгөөс эхний ээлжид 160 тэрбум төгрөгийг төлж барагдуулсан талаар мэдэгдсэн байна. Ингэснээр мөн хэмжээний хувьцаа Төрийн мэдэлд шилжсэнийг баталгаажуулж байгааг тодотголоо.

Ийнхүү 49 хувийг шилжүүлэн авах хэлцлээс тав орчим жилийн дараа Засгийн газартай хийх хэлцэлд ахиц гарч байгаа аж. Засгийн газар хэлцэл нааштай үргэлжилж байгаа гэсэн байна.

Үүний зэрэгцээ Монгол Улсад уул уурхай, металлургийн цогцолбор байгуулах төсөл хэрэгжүүлдэг “Кью Эс Си” компани Хөгжлийн банкны 191.1 тэрбум төгрөгийн зээлийг бүрэн төлж барагдуулсныг мэдээллээ. Мөн Төрийн мэдэлд буцаан авсан Хөтөлийн цемент шохойн үйлдвэрийн өмчлөлийг Төр хэрэгжүүлэх нь зүйтэй гэж үзэж буйгаа Худалдаа, Хөгжлийн банкны хувь эзэмшигч Д.Эрдэнэбилэг Засгийн газарт хүргүүлсэн захидалдаа дурдсан байна.

“Цаашид “Эрдэнэт үйлдвэр” болон “Монросцветмет”-ийн 49 хувийн хувьцаатай холбоотой асуудалд УИХ, Засгийн газар, Үндсэн хуулийн цэцийн тогтоол, шийдвэрүүдийг хэрэгжүүлж, шударгаар шийдвэрлэн, худалдаж авахад гаргасан төлбөртэй холбоотой хэлцэл цааш үргэлжлэх хэрэгтэй. Мөн нэг мөр эцэслэх нь хамгаас чухал” хэмээн байр сууриа илэрхийлжээ.