Нийлүүлэлт нэмэгдсэнээр БНХАУ-д Монголын коксжих нүүрсний үнэ буурч байна

Коксжих нүүрс болон ган үйлдвэрлэгчдийн эрэлт бага байгаатай зэрэгцэн Ганцмод хилийн боомтод Монголын коксжих нүүрсний үнэ буураад байна.

Тавдугаар сарын 25-26-нд “SXCoal”-ийн тооцоолсноор Монголын түүхий коксжих нүүрсний үнэ Ганцмод боомтод тонн нь 1900-1950 юаньд хэлбэлзэж байв. Энэ нь өмнөх хоёр хоногийнхоос 50 юаниар буурсан дүн юм.

Үүнтэй харьцуулахад Жингтанг боомтод ОХУ-ын коксжих нүүрсний спот үнэ тонн нь 2800 юань байна. Энэ нь долоо хоногийн өмнөхөөс 100-150 юаниар буурсан үзүүлэлт боллоо.

Коксжих нүүрсний үнэ буурахад Монголын импорт өссөн нь голлон нөлөөлсөн байна.

Хоёр улсын нүүрсний компаниудын хамтын ажиллагааг нэмэгдүүлэхээр зургаадугаар сарын 14-нд Монголын нүүрсний ассоциаци болон “Fenwei Digital Information Technology” компани хамтран "БНХАУ Монголын нүүрсний компаниудын арилжаа" цахим хурлыг зохион байгуулахаар болсон байна.

Эх сурвалж: Bloombergtv.mn