Беларусь улсаас ХАА-н есөн төрлийн 445 ширхэг техник, тоног төхөөрөмж нийлүүлнэ

Монгол Улсын Засгийн газар Бүгд Найрамдах Беларусь Улсын Засгийн газар хоорондын Экспортын зээлийн хүрээнд Монгол Улсад хөдөө аж ахуйн техник, тоног төхөөрөмж нийлүүлэх төслийн хоёрдугаар үе шатыг хэрэгжүүлэх гэрээнд Хүнс, хөдөө аж ахуй, хөнгөн үйлдвэрийн яамны Газар тариалангийн бодлын хэрэгжилтийг зохицуулах газрын дарга В.Үнэнбат 2021 оны 11 дүгээр сарын 1-ний өдөр Минск хотноо гарын үсэг зурлаа.

Төслийн хоёрдугаар үе шатны хүрээнд есөн төрлийн 445 ширхэг техник, тоног төхөөрөмж 2022 оны нэгдүгээр улиралд Монгол Улсад нийлүүлэх бөгөөд Беларусийн талын хэрэгжүүлэгч байгууллагаар “Минскийн тракторын үйлдвэр” нээлттэй хувьцаат нийгэмлэг ажиллах юм.

Хөдөө аж ахуйн техник, тоног төхөөрөмж нийлүүлэх төслийн нэгдүгээр үе шат 2021 оны 8, 9 дүгээр сард амжилттай хэрэгжиж дуусжээ. Намрын ургац хураалт, өвөлжилтийн бэлтгэл ажилд зориулан оруулж ирсэн 17 төрлийн 534 ширхэг техник, тоног төхөөрөмж малчид, тариаланчдын гарт бүрэн хүрсэн байна.

Энэхүү төсөл нь “Алсын хараа-2050” Монгол Улсын урт хугацааны хөгжлийн бодлого болон Засгийн газрын 2020-2024 оны үйл ажиллагааны хөтөлбөр,  Атрын дөрөвдүгээр аяныг хэрэгжүүлэхэд ихээхэн ач холбогдолтой болно хэмээн ХААХҮЯ-наас мэдээлэв.