IX/1-нээс хойш дотоодын үйлдвэрлэгч компаниудын хувьцааны ханш 20 гаруй хувиар өслөө
Сүүлийн гурван сар орчмын буюу есдүгээр сарын нэгнээс хойш Монголын Хөрөнгийн биржийн “Топ-20”-ийн сагсанд багтдаг дотоодын үйлдвэрлэгч компаниудын хувьцааны ханш 20 гаруй хувиар өссөн байна.
“Монос хүнс” ХК-ийн нэгж хувьцааны ханш есдүгээр сарын нэгэнд 72.73 төгрөг байсан бол сүүлийн арилжаагаар буюу 11 дүгээр сарын 22-нд 94 төгрөгт хаагдлаа. Ийнхүү хувьцааны ханш нь 29.2 хувиар буюу хамгийн их өссөн байна.
11 дүгээр сарын 19-нд хувьцааны ханш нь 94.88 төгрөгт хаагдсан нь 2019 онд IPO хийснээс хойш түүхэн дээд ханшдаа хүрсэн үзүүлэлт боллоо. Хоёр жилийн хугацаанд “Монос хүнс” ХК-ийн хувьцааны ханшаар илэрхийлэх зах зээлийн үнэлгээ 9.8 тэрбум төгрөгөөр нэмэгдсэн байна.
“Түмэн шувуут” ХК болон “Талх чихэр” ХК болон “Сүү” ХК-ийн нэгж хувьцааны ханш сүүлийн гурван сар орчмын хугацаанд тус тус 24 гаруй хувиар өссөн бол “Дархан нэхий” ХК-ийнх 16.6 хувиар өсжээ.
АПУ ХК-ийн хувьд нэгж хувьцааны ханш нь 14.6 хувиар өссөн байна. Түүнчлэн зах зээлийн үнэлгээ нь хамгийн их хэмжээгээр нэмэгдсэнийг онцолж болохоор байгаа юм. Есдүгээр сарын нэгнээс хойш үнэлгээ нь 521 тэрбум төгрөгөөр нэмэгджээ. Даваа гарагийн арилжаа хаагдахад нэг их наяд 583.8 тэрбум төгрөгөөр хэмжигдэж байна.
Цар тахлын хямрал тохиосон үед компаниудын хувьцааны ханш буурч, арилжааны идэвх суларч байсан бол есдүгээр сараас эхлэн тогтворжиж, ялангуяа үйлдвэрлэгч компаниудын хувьцааны үзүүлэлт эрс сайжирсан байна.
