УЛААНБААТАР ХОТЫН ХУДАЛДААНЫ ТАНХИМЫН ГИШҮҮН БАЙГУУЛЛАГУУД НИТХ-ЫН ЗӨВЛӨЛИЙН ГИШҮҮДЭД САНАЛ, ТУЛГАМДСАН АСУУДЛАА ДУУЛГАЖ ШИЙДЭЛ СОЛИЛЦЛОО

УБХТ 2-р сарын 13-нд НИТХ-ын Дарга А.Баяр, Зөвлөлийн гишүүдтэй Танхимын гишүүн 10 гаруй ААН Улаанбаатар хотод бизнес эрхлэхэд тулгамдаж буй асуудлаа танилцуулж, шийдэх боломжийн тухай санал солилцох зорилготой уулзалт зохион байгуулав.

Энэ үеэр НЗД-ын 1-р орлогч Т.Даваадалай мөн оролцож 2026 онд Бизнес эрхлэгчдийг дэмжих чиглэлээр хэрэгжүүлж буй “Бодлого, Хууль, эрх зүйн орчин” хаашаа чиглэж буй, хэрхэн ажиллах тухай танилцуулсан юм.

ААН-үүд эрчим хүч, дулаан, ус хангамжийн хүртээмж, газар зохион байгуулалт, хотын стандартын хэрэгжилтийг сайжруулах шаардлагыг онцлон хөндөв. Мөн аж ахуйн нэгжийн орлогын албан татвар, нэмэгдсэн өртгийн албан татвар болон салбарын онцлогоос шалтгаалах бусад татварын зохицуулалтыг боловсронгуй болгох саналыг дэвшүүллээ.

Түүнчлэн хотын захиргаа болон харьяа агентлагуудаас олгодог зөвшөөрлийн шинжтэй бичиг баримтын судалгааг хийж, шаардлагагүй бичиг баримтыг хүчингүй болгох, төр-хувийн хэвшлийн хамтын ажиллагааг бэхжүүлэх зорилгоор НИТХ-ын дэргэд төр, хувийн хэвшлийн зөвлөл байгуулах санал гаргалаа.

НИТХ-ын төлөөлөгчид бизнесийн орчныг сайжруулах, бодит хүндрэл бэрхшээлийг бууруулах чиглэлээр гарсан саналуудыг бодлого, шийдвэрт тусгах боломжийг судалж ажиллахаа илэрхийллээ.