УБХТ-ын гишүүдийн төлөөлөл ЗГХЭГ-ын дарга Д.Амарбаясгалантай уулзаж бизнесийн орчныг сайжруулах асуудлаар санал солилцлоо

Тус уулзалтын үеэр төр, хувийн хэвшлийн хамтын ажиллагааг хөгжүүлэх, томоохон боомтуудыг шинээр нээх замаар тээврийн зардлыг бууруулж уул уурхайн бус экспортыг дэмжих, хөрөнгө оруулалтын орчныг сайжруулах боломжийн талаар дэлгэрэнгүй ярилцав. Түүнчлэн Засгийн газрын дэргэд "Бизнес, хөрөнгө оруулалтын зөвлөл"-ийг байгуулж бизнесийн орчныг сайжруулахад чиглэлээр авах арга хэмжээг тухай бүрд нь ярилцаж шийдэж байх, гадаад, дотоодын хөрөнгө оруулагчдын эрх ашиг, гомдлыг тухай бүрд нь шийддэг болох нь зүйтэй гэсэн саналыг УБХТ-аас гаргалаа. 

Засгийн газрын зүгээс ойрын хугацаанд хэрэгжүүлэх ажлын талаар ЗГХЭГ-ын дарга мөн танилцуулав. Тухайлбал Монгол улсын Засгийн газраас мэргэжлийн хяналтын тогтолцоог шинэчлэх, стандартын тухай хуулийг шинэчлэх, тусгай зөвшөөрөл олгох, тусгай зөвшөөрөлтэй үйл ажиллагаа эрхлэх шат дарааллыг сайжруулах бодлого баримталж байгаа юм байна. 

Уулзалтад Улаанбаатар хотын Худалдааны танхимын Ерөнхийлөгч А.Ганхуяг, Гүйцэтгэх захирал Б.Хаш-Эрдэнэ, Ард санхүүгийн нэгдэл ХК-ийн Гүйцэтгэх захирал Ч.Ганхуяг, Нийслэлийн засаг даргын зөвлөх Э.Тэмүүлин, Интейлмайнд ХХК-ийн Гүйцэтгэх захирал Ц.Мэндбаяр, СМС Маркетинг спэйс ХХК-ын ТУЗ-ын дарга Ж.Золзаяа, Онч Аудит ХХК-ийн Ерөнхий захирал Д.Ончинсүрэн нар оролцлоо.