“АПУ” ХК-ИЙН ҮЙЛДВЭР, ЛОЖИСТИКИЙН ТӨВТЭЙ “ТАНИЛЦАХ АЯЛАЛ”

Улаанбаатар хотын худалдааны танхимаас ААН-үүдийг холбох, үйл ажиллагаатай танилцах, хамтарч ажиллах, туршлага судлах боломж олгож “Танилцах аялал” зохион байгуулдаг билээ.

Энэ удаад Танхимын Удирдах зөвлөл, 100 гаруй жилийн түүхтэй, Монголын хүнсний ууган үйлдвэр “АПУ” ХК-ийн Үйлдвэр, Ложистикийн төвтэй “Танилцах аялал”-ыг 1-р сарын 22-нд зохион байгуулав.

“АПУ” ХК нь 300 гаруй нэр төрлийн бүтээгдэхүүн үйлдвэрлэж, дотоод болон гадаадын зах зээлд нийлүүлж байна. Олон улсын зах зээлд ОХУ, БНХАУ-ын ӨМӨЗО, Япон, БНСУ, Бельги, Франц, Герман, АНУ зэрэг улсууд руу бүтээгдэхүүнээ экспортлодог аж. ISO 9001 Чанарын удирдлагын тогтолцоо, ISO 14001 Байгаль орчны удирдлагын тогтолцоо болон FSS 22000 Хүнсний аюулгүй байдлын тогтолцооны баталгаажуулалтын стандартуудыг хамтад нь нэвтрүүлсэн Монголын анхны компани юм. Тус компани нь мөн Олон улсад хүлээн зөвшөөрөгдсөн “Ажиллахад таатай газар” сертификатыг Монгол улсаас анх удаа хүлээн авсан байна.

Танилцах аяллын оргил хэсэг болох дэлхийн жишигт хүрсэн Хүнсний автомат агуулах бүхий Ложистик төв нь хүчин чадлын хувьд Монголдоо хамгийн томд тооцогдох бүрэн хэмжээний автомат агуулах аж. Уг төв нь үйлдвэрээс бэлэн болсон бүтээгдэхүүнийг үйлдвэрийн дамжлагаас нь шууд татан төвлөрүүлж, хадгалж, буцаагаад захиалгын дагуу маш түргэн шуурхай түгээдэг бүрэн автомат үйлдвэрлэл аж.

Мөн тус төв нь 96.000 метр куб, арван мянга гаруй поддон бараа хадгалах багтаамж бүхий 12 давхар ган хийц байгууламж юм байна.

УБХТ-аас зохион байгуулсан тус арга хэмжээнд оролцсон ААН-үүдийн төлөөллүүдэд талархсанаа илэрхийлье. Та бүхэнд бидний ажилд байнга идэвхтэй оролцож байхыг хүсье.