ШААРДЛАГА -МОНГОЛ УЛСЫН ЗАСГИЙН ГАЗАР, УЛСЫН ОНЦГОЙ КОМИСС, НИЙСЛЭЛИЙН ОНЦГОЙ КОМИССТ

МОНГОЛ УЛСЫН ЗАСГИЙН ГАЗАР, УЛСЫН ОНЦГОЙ КОМИСС, НИЙСЛЭЛИЙН ОНЦГОЙ КОМИССТ

ШААРДЛАГА

Бизнес эрхлэгчид, хувийн хэвшлийнхэн бид цар тахлын тархалтыг зогсоох нэрийдлээр зарим салбарын бизнесийг хааж, зогсоож, улмаар энэ арга хэмжээгээ байнга сунгаж байдгийг ЭСЭРГҮҮЦЭЖ байна. Цаашид аливаа төрлийн бизнесийн үйл ажиллагааг хааж зогсоох ямар нэгэн арга хэмжээ авахгүй байхыг хүсч байна.

Учир нь өнөөг хүртэл бизнес эрхлэгчид бид Засгийн газар, УОК, НОК зэрэг бүх шатны төрийн байгууллагуудын тавьсан шаардлага, хэлсэн үг, хэрэгжүүлсэн арга хэмжээг хэлбэрэлтгүй даган мөрдөж ард иргэдийнхээ эрүүл мэндийг хамгаалахад өөрсдийн хувь нэмрээ оруулахаас гадна өөрийн ажилчид, тэдний гэр бүлийн амьдралын нөхцлийг доройтуулахгүйн тулд бүх боломжоороо ажлын байраа хадгалж үлдэхийн төлөө зүтгэсээр ирсэн.

Харамсалтай нь бизнес эрхлэгчид биднээс шалтгаалахгүй нөхцөл байдлуудаас үүдэн хүний бөөгнөрөл, хөл хөдөлгөөн орон даяар нэмэгдсэн нь хэн бүхний нүдэнд ил байхад татвар төлөгч аж ахуйн нэгжүүд, хувиараа бизнес эрхлэгчдийн буруу мэтээр зөвхөн хувийн хэвшлийнхний үйл ажиллаааг хаах арга хэмжээг юуны түрүүнд авдгаа болихыг шаардаж байна.

Бизнес эрхлэгчид бид төрийн байгууллагуудаас гаргасан халдараас хамгаалах дэглэмийг мөрдөж, стандартын дагуу үйл ажиллагаагаа явуулах тул үйл ажиллагааг нээх шийдвэр гаргана гэдэгт итгэж байна.   

УЛААНБААТАР ХОТЫН ХУДАЛДААНЫ ТАНХИМ