ОРОН НУТГИЙН БИЗНЕСИЙН САЛБАРЫНХАНД БИЗНЕС ДЭХ ХҮНИЙ ЭРХ СУРГАЛТ ЗОХИОН БАЙГУУЛЛАА
Европын Холбооны санхүүжилтээр НҮБ-ын Хөгжлийн хөтөлбөрөөс хэрэгжүүлж буй “Бизнес ба Хүний эрх” төслийн хүрээнд Улаанбаатар хотын худалдааны танхим “Бизнес дэх хүний эрх: Хүний эрхийн магадлан шинжилгээ” сургалт амжилттай болж өндөрлөлөө.
Сургалт энэ сарын 23-24 ба 29-30-нд болж, Хэнтий, Булган, Говь-Алтай, Дундговь, Говьсүмбэр, Сэлэнгэ, Дорнод, Өвөрхангай аймгийн 40 гаруй бизнесийн төлөөлөл хамрагдав.
“Бизнес дэх хүний эрх: Хүний эрхийн магадлан шинжилгээ” сургалт нь орон нутгийн бизнес эрхлэгчид болон сонгогдсон аймгууд дахь Худалдаа, аж үйлдвэрийн танхимын мэргэжилтнүүдэд бизнес дэх хүний эрхийн тухай ойлголт болон НҮБ-ын "Бизнес ба хүний эрхийн удирдах зарчмууд"-ын тухай дэлгэрэнгүй мэдлэг олгох, "Хүний эрхийн магадлан шинжилгээ"-г бизнесийн байгууллагуудад үр дүнтэй хийж гүйцэтгэхэд зориулсан арга зүйг эзэмшүүлэх зорилготой юм.
Сургалтын сургагч багшаар: Улаанбаатар хотын худалдааны танхимын Гүйцэтгэх захирал Б.Хаш-Эрдэнэ, НҮБ-ын Хөгжлийн хөтөлбөрийн Бизнес ба Хүний эрх төслийн Зохицуулагч Т.Ариунаа, Европ-Монголын хамтарсан худалдааны танхимын Бодлого эрхэлсэн захирал Л.Бямбаханд, Монголын хөнгөн үйлдвэрийн үйлдвэрчний эвлэлийн Дарга Э.Тамир, Зах зээл судлалын хүрээлэнгийн Захирал Ч.Нэргүй, МУИС-ийн Хууль зүйн сургуулийн багш Б.Баасандорж, Genesis жендерийн бодлого судлалын хүрээлэнгийн УЗ дарга П.Баярцэцэг, GS1 Mongolia байгууллагын Төслийн менежер Л.Уянга, Монголын хүнсчдийн нэгдсэн холбооны Хуульч Г.Золзаяа нар ажиллав.
