УБХТ БНХАУ-ын Хөх хот, Бугат хотуудын Гадаад худалдааг дэмжих хороо, Арбитрын байгууллагуудтай хамтран ажиллахаар боллоо
БНХАУ, тэр дундаа ӨМӨЗО-ы бизнес эрхлэгчид Монголын бизнес эрхлэгчдийн хамгийн идэвхтэй харилцдаг бизнес түншүүд байдаг билээ. Иймээс Улаанбаатар хотын Худалдааны Танхим БНХАУ-ын ӨМӨЗО, Хөх хот, Бугат хотуудын бизнес эрхлэгчдийг төлөөлж ажилладаг байгууллагуудтай уулзаж тодорхой асуудлуудаар хамтран ажиллахаар "Санамж бичиг" байгуулж хамтын ажиллагаагаа өргөжүүлж байна.
Тухайлбал, БНХАУ-ын Гадаад худалдааг дэмжих хорооны ӨМӨЗО, Хөх хот дахь салбар хороо, Хөх хот, Бугат хотуудын Арбитрын төвүүдтэй хамтран ажиллаж Монгол-Хятадын бизнес эрхлэгчдийн хамтын ажиллагааг өргөжүүлэх, бизнес эрхлэгчдийг холбож өгөх гүүр болж ажиллах, арбитрын хамтын ажиллагаагаар дамжуулан хоёр улсын бизнес эрхлэгчдийн хооронд үүссэн маргааныг шийдвэрлэхэд харилцан хамтран ажиллахаар тохиролцлоо.
Түүнчлэн Бугат хотын Болд төмөрлөгийн үйлдвэртэй удаан хугацаанд харилцаж, ӨМӨЗО-ны худалдааг дэмжих чиглэлээр ажилладаг албадын дэмжлэг туслалцаатайгаар тус үйлдвэрийн дистрибьютерээр УБХТ-ын гишүүн компани ажиллахаар болж тохиролцоонд хүрэв.
Үүний үр дүнд, Улаанбаатар хотод цаашид хэрэгжих барилга, дэд бүтцийн томоохон төслүүдэд шаардлагатай чанарын баталгаатай төмөр хийц, эдлэлүүдийг найдвартай эх үүсвэрээс нь шууд нийлүүлэх, тус танхимын гишүүд тодорхой хөнгөлөлт эдлэх боломж бүрдэж байна.
