УБХТ МОНГОЛЫН ААН-ҮҮДИЙГ БНХАУ-ЫН ШЭНЬЖЭНЬ ХОТЫН ТОМООХОН ААН, ХӨРӨНГӨ ОРУУЛАГЧИДТАЙ ХОЛБОСОН В2В УУЛЗАЛТ АМЖИЛТТАЙ ЗОХИОН БАЙГУУЛЛАА
Улаанбаатар хотын худалдааны танхимаас 6-р сарын 30-нд танхимын гишүүд болон бусад ААН-үүдийг БНХАУ-ын Шэньжэнь хотын томоохон ААН, хөрөнгө оруулагчидтай холбох үүднээс В2В бизнес уулзалт амжилттай зохион байгууллаа.
Тус уулзалт нь Монголын эдийн засгийн хөгжлийн төв, Монголын Эдийн Засгийн Форум хамтран зохион байгуулсан "Unlock the Mongolian Economy" өргөтгөсөн хуралдааны хүрээнд зохион байгуулав.
Уулзалтад Монголын 30 гаруй, Шэньжэнь хотын 10 гаруй ААН-ийн төлөөлөл, хөрөнгө оруулагч, бизнес эрхлэгчид оролцож, харилцаа холбоо тогтоон, хамтарч ажиллах, хөрөнгө оруулалт татах боломж ярилцаж, цаашид хамтран ажиллах гараа эхэлсэн юм. Энд оролцсон Монголын ААН-үүд өмнө хамтарч ажиллахаар төлөвлөж, судлаж байсан компаниудтай уулзах боломж бүрдсэн тухайгаа дурдаж байлаа.
Энэ өдөр мөн НЗДТГ-аас нийслэлд хэрэгжүүлэх томоохон төсөл, хөтөлбөрүүдийн танилцуулга хийгдээ, нийслэлд хийх хөрөнгө оруулалтын тухай мэдээлэл хүргэв.
Энэ үеэр нийслэлийн Засаг дарга бөгөөд Улаанбаатар хотын Захирагч Б.Пүрэвдагва тус үйл ажиллагааг нээж: “Төр бизнестэй өрсөлдөхгүй, хот бизнес эрхлэхгүй бөгөөд харин бизнес эрхлэх таатай, ойлгомжтой, тогтвортой орчныг бүрдүүлнэ. Бид хөрөнгө оруулалтын орчныг сайжруулж, зөвшөөрөл, зохицуулалтын хүндрэлүүдийг бууруулан, төслийн ил тод байдал, хариуцлагыг олон улсын жишигт нийцүүлэхэд онцгой анхаарч ажиллаж байна.
Улаанбаатар хот дараагийн хөгжлийн шатандаа шилжиж байна. Бидэнд өсөн тэлж буй зах зээл, хэрэгжүүлэх томоохон төслүүд, хувийн хэвшлийг дэмжих бодлого бий. Гэхдээ энэ хөгжлийг дангаар хэрэгжүүлэх боломжгүй. Хотын ирээдүйн өсөлт нь төр, хувийн хэвшил, олон улсын хөрөнгө оруулагчид, хөгжлийн байгууллагуудын бодит түншлэлд тулгуурлана. Төр-хувийн хэвшлийн түншлэл нь зөвхөн санхүүжилтийн хэрэгсэл бус, эрсдэлийг зөв хуваарилах, төслийн чанар, менежментийн үр ашгийг дээшлүүлж, иргэдэд илүү чанартай -үйлчилгээ хүргэх хөгжлийн механизм юм. Нийслэлийн зүгээс хөрөнгө оруулагчдын санал, санаачилгыг нээлттэй хүлээн авч, шийдвэр гаргах үйл явцыг илүү шуурхай, ойлгомжтой, үр ашигтай болгохын төлөө тууштай ажиллана. Бид Улаанбаатар хотыг бизнес эрхлэхэд таатай, хөрөнгө оруулагчдад итгэл төрүүлэхүйц, ногоон, ухаалаг, өрсөлдөх чадвартай хот болгон хөгжүүлэхийг зорьж байна” гэлээ.
