БНХАУ-ын ДНБ-ий өсөлт саарч, 4.9 хувь болов

Үл хөдлөх хөрөнгийн салбарын хатуу зохицуулалт, эрчим хүчний хямрал, хэрэглэгчийн зарцуулалт буурсан зэрэг хүчин зүйлсийн нөлөөгөөр БНХАУ-ын эдийн засгийн өсөлт саарлаа.

БНХАУ-ын дотоодын нийт бүтээгдэхүүн III улиралд 4.9 хувиар өсжээ. Харин өмнөх улиралд 7.9 хувиар өсөөд байсан юм.

Тус улсын аж үйлдвэрийн гарц есдүгээр сард өмнөх оныхоос 3.1 хувиар өссөн байна. Энэ нь шинжээчдийн таамгаас тааруу дүн боллоо.

Харин жижиглэн худалдааны борлуулалт шинжээчдийн таамгаас давж, 4.4 хувиар өсжээ. БНХАУ-ын эрх баригчид санхүүгийн эрсдэлийг зохицуулах хүрээнд үл хөдлөх хөрөнгийн салбарт хяналтаа чангатгаж байгаа юм. Үл хөдлөх хөрөнгийн борлуулалт болон үнэ ч буурч эхлээд байна.

Мөн өнгөрсөн сард эрчим хүчний хязгаарлалтаас үүдэн үйлдвэрүүд доголдсон юм. Ингэснээр БНХАУ-ын үйлдвэрлэлийн салбарын худалдан авагч менежерүүдийн индекс огцом буурчээ.