УЛААНБААТАР ХОТЫН ХУДАЛДААНЫ ТАНХИМ ГАДААД ХАРИЛЦАА, БИЗНЕСИЙН ТҮНШЛЭЛИЙГ ӨРГӨЖҮҮЛНЭ

Улаанбаатар хотын худалдааны танхим Монголын бизнесийн орчныг олон улсын зах зээлтэй холбох, гадаад улс орнуудтай эдийн засаг, худалдаа, бизнесийн харилцааг өргөжүүлэх, бизнес эрхлэгчдийн хамтын ажиллагаа, түншлэлийн боломжийг нэмэгдүүлэх зорилгоор Бүгд Найрамдах Хятад Ард Улс, Япон болон Америкийн Нэгдсэн Улсад төлөөлөгч томилон ажиллуулах боллоо.

Төлөөлөгчид нь тухайн улс орнуудын бизнесийн байгууллага, худалдааны танхим, хөрөнгө оруулагч, аж ахуйн нэгжүүдтэй харилцаа холбоо тогтоож, Монголын бизнес эрхлэгчдийг олон улсын түншүүдтэй холбох, худалдаа, хөрөнгө оруулалт, бизнесийн хамтын ажиллагааны шинэ боломжийг эрэлхийлэх чиглэлээр ажиллана.

Ингэснээр Монголын аж ахуйн нэгжүүдэд гадаад зах зээлд гарах, түнш байгууллага олох, хөрөнгө оруулалт татах болон олон улсын бизнесийн орчинд нэвтрэхэд шаардлагатай мэдээлэл, харилцаа холбоог бий болгоход төлөөлөгчдийн үйл ажиллагаа чиглэх юм.

Энэ нь УБХТ-ын “бизнесийг холбох, боломжийг нээх” чиг үүргийг олон улсын түвшинд өргөжүүлж, гишүүн байгууллагууд болон нийт бизнес эрхлэгчдэд гадаад зах зээлд гарах бодит боломжийг нэмэгдүүлэх чухал алхам болж байна.

Цаашид Улаанбаатар хотын худалдааны танхим нь гадаад улс орнуудын худалдааны танхим, бизнесийн байгууллагуудтай хамтын ажиллагаагаа өргөжүүлж, Монголын бизнес эрхлэгчдийн олон улсын бизнесийн харилцаа, түншлэлийг цаашид улам гүнзгий дэмжин ажиллах боломжтой боллоо.