УЛААНБААТАР ХОТЫН ХУДАЛДААНЫ ТАНХИМ СОЛОНГОСЫН АЖ ҮЙЛДВЭРИЙН БАНКТАЙ ХАМТАРЧ АЖИЛЛАХААР БОЛЛОО
Улаанбаатар хотын худалдааны танхимын Ерөнхийлөгч Д.Ончинсүрэн, Гүйцэтгэх захирал Б.Хаш-Эрдэнэ нар энэ 11-р сарын 19-нд Industrial Bank of Korea-н /Солонгосын Аж үйлдвэрийн банк/ Глобал Бизнесийн хэлтсийн Ерөнхий Менежерийн Орлогч David Ihnsig Sung-тай уулзлаа.
Уулзалтын үр дүнд Улаанбаатар хотын худалдааны танхим болон танхимын гишүүн байгууллагуудтай Industrial Bank of Korea цаашид хамтран ажиллах боломжтой чиглэлүүдийг ярилцаж Монгол-БНСУ-ын хооронд байгуулагдах чөлөөт худалдааны хэлэлцээрт Монголын компаниудыг бэлдэх, Монголын компаниудад хөрөнгө оруулалт хийх, хоёр орны компаниудыг холбож өгөх, хамтран ажиллах боломжийг бий болгохоор тохиролцлоо.
Солонгосын аж үйлдвэрийн банк нь 1961 онд байгуулагдсан бөгөөд 14000 орчим ажилчинтай, улсдаа 700 орчим, гадаадын 13 улсад 60 салбартай, Солонгосын Засгийн газар дийлэнх буюу 59.5 хувийн хувьцааг эзэмшдэг томоохон банк юм.
Тус банк нь жижиг, дунд бизнесийг дэмждэг БНСУ-ын хамгийн том банкуудын нэг бөгөөд энэ хүрээндээ старт-ап компаниуд, ЖДҮ эрхлэгчдэд зээл олгох, бизнесийн бүх төрлийн зөвлөгөө өгөх инкубатор төв ажиллуулах, венчур хөрөнгө оруулалт хийдэг.
Тухайлбал, 2023 онд тус банк 230 триллион воны зээл олгосноос гадна санхүүгийн дэмжлэгийн 33.4 хувь буюу 103.5 триллион воныг технологийн салбарын санхүүжилтэд, венчур капиталын хөрөнгө оруулалтад 764.1 тэрбум воны дэмжлэг үзүүлжээ. Түүнчлэн тус банк АНУ, Их Британи, Польш, Япон, Энэтхэг, Вьетнам гэх мэт 13 улсад 60 салбар ажиллуулж тухайн улсуудын ЖДҮ эрхлэгчдийг дэмжих, улс хоорондын бизнесийн харилцан хамтын ажиллагааг хөгжүүлэхээр ажиллаж байна.
